ყოფა-ეთნოგრაფიის ფონდი

ყოფა-ეთნოგრაფიის ფონდში დაცულია 1186 – ზე მეტი ექსპონატი, რომელიც განთავსებულია  ავეჯის, ქსოვილის, ხის, სხვადასხვა და დარგობრივ კოლექციებში. ფონდში დაცული მასალების მნიშვნელობა ფასდაუდებელია, ვინაიდან აღნიშნულ კოლექციებში დავანებულია არამარტო  დადიანების კოლექციების დიდი ნაწილი, არამედ სამეგრელოს მოსახლეობის ყოფითი კულტურის ამსახველი ექსპონატები.

ქსოვილის კოლექციაში დაცულია ძირითადად რიტუალური დანიშნულებისა და ქართული საეკლესიო ნაქარგობის შესანიშნავი ნიმუშები. მათ შორისაა ,,ცაიშის გარდამოხსნა“  დათარიღებული1653 წლით. ლევან მე-2 დადიანის მიძღვნითი წარწერით, რომელიც წარმოადგენს მრავალფიგურიან სიუჟეტურ კომპოზიციას. აქვეა დაცული მე-17, მე- 18 მე-19 საუკუნეების დაფარნები, ენქერები, საბუხარები, საფარები, მოქარგული სირმითა და  ოქრომკედით. კოლექციაში ასევე დაცულია ხალიჩები, ნაქარგი პორტრეტები, გულისპირები, დროშები, საწერილეები ნიკო დადიანის მონოგრამით.

ავეჯის კოლექციაში დაცულია დავით, ნიკო ანდრია და სალომე დადიანების, ეკატერინე ჭავჭავაძე – დადიანის პირადი ნივთები.ცალკე აღსანიშნავია ევროპული კულტურის ამსახველი ნიმუშები: ბულეს, ამპირის, როკოკოს, ბაროკოს სტილის კარადები, მაგიდები, ტუმბოები, სავარძლები, სკამები, კარადა-ვიტრინები, ყუთები სამშვენისებისთვის, ნესესერები ეკატერინესა და სალომე დადიანების მონოგრამებით. ასევე სადუელო ჩემოდნები. განსაკუთრებულ ადგილს იკავებს საფრანგეთის იმპერატორის ნაპოლეონ 1-ლის  პირადი ნივთები – სეკრეტერები, მაგიდები ფაიფურის ჯამით და სხვა აქსესუარები.