მუზეუმის ფონდები: კვლევა, ტენდენციები და გამოწვევები – ხელოვნების სასახლეში სამეცნიერო კონფერენცია გაიმართა
საქართველოს ხელოვნების სასახლე – კულტურის ისტორიის მუზეუმში გაიმართა რიგით მესამე სამეცნიერო კონფერენცია, რომელიც მიეძღვნა მუზეუმის ფონდების კვლევას, მათ ტენდენციებსა და გამოწვევებს. ღონისძიებაში მონაწილეობა მიიღეს საქართველოს სხვადასხვა მუზეუმის წარმომადგენლებმა, მათ შორის, აქტიურად ჩართული იყო დადიანების სასახლეთა ისტორიულ-არქიტექტურული მუზეუმი.
დადიანების მუზეუმის თანამშრომლებმა წარმოადგინეს თემები, რომლებიც მოიცავდა მუზეუმების თანამედროვე გამოწვევებს, ევროპულ კულტურულ კავშირებსა და უნიკალური კოლექციების კვლევას.
წარმოდგენილი მოხსენებები:
ანზორ ოყუჯავა – “დადიანთა კავშირები ევროპასთან”
მარინა ქობალია – “დადიანების ფონდებში დაცული ფოტოკოლექციის კვლევისათვის”
ნაზიბროლა ქორთუა – “კაპიტონ ცანავა – ხეზე კვეთის ოსტატი”
მარიამ ანჯაფარიძე – “მუზეუმები თანამედროვე სამყაროში: გამოწვევები, ინოვაციები და განვითარების პერსპექტივები”
სოფიო კობახიძე – “დადიანების ევროპული ბაღი”
მალვინა მეფორია – “ლევან მეორე დადიანის საოქრომჭედლო სახელოსნო”
კონფერენციის ფარგლებში განხილული იქნა მუზეუმების ფონდების კვლევის თანამედროვე მეთოდები, არსებული გამოწვევები და სამომავლო პერსპექტივები. განსაკუთრებული ყურადღება დაეთმო დადიანების სასახლის ისტორიულ მნიშვნელობას, მის ფონდებში დაცულ უნიკალურ ექსპონატებს, ხელნაწერებს, ფოტოფონდსა და კულტურულ მემკვიდრეობას.
კონფერენციამ კიდევ ერთხელ გაუსვა ხაზი მუზეუმების სამეცნიერო მუშაობის მნიშვნელობასა და კულტურული მემკვიდრეობის კვლევის აუცილებლობას.
მადლობას ვუხდით საქართველოს ხელოვნების სასახლე-კულტურის ისტორიის მუზეუმს მასპინძლობისთვის!
განსაკუთრებული მადლობა ქალბატონ იზოლდა მელიქიშვილსა და ელიზაბედ უგულავას სამეცნიერო ღონისძიების ორგანიზებისთვის, ასევე ყველა მონაწილეს ამ მნიშვნელოვან ინიციატივაში ჩართვისთვის!
